سعودی حکام نے مکہ اور مدینہ میں دکانوں اور تجارتی مراکز کی سخت جانچ شروع کر دی ہے تاکہ رمضان المبارک کے دوران صحت اور حفاظتی اصولوں کی پاسداری کو یقینی بنایا جا سکے۔
سعودی فوڈ اینڈ ڈرگ اتھارٹی (SFDA) نے وزارت بلدیات اور وزارت تجارت کے تعاون سے یہ مہم شروع کی۔ شعبان کے وسط سے شروع ہونے والی انسپیکشن مہم کے دوران 1,891 سہولیات کا معائنہ کیا گیا، جس میں سے 1,226 ٹن غیر معیاری اشیاء ضبط کی گئیں۔
حکام نے 29 غیر لائسنس یافتہ کاروبار پکڑے اور 1,480 گوداموں، فیکٹریوں اور دکانوں میں 636 خلاف ورزیاں ریکارڈ کیں۔ ان خلاف ورزیوں کی بنیاد پر 11 سہولیات کو مکمل طور پر سیل کر دیا گیا۔
حکام کے مطابق، رمضان المبارک اور حج سیزن کے پیش نظر مکہ اور مدینہ میں انسپیکشن مہم مزید سخت کی جائے گی تاکہ زائرین کو محفوظ اور معیاری خوراک فراہم کی جا سکے۔
واضح رہے کہ مکہ مکرمہ کو سعودی عرب کا مقدس دارالحکومت کہا جاتا ہے، جہاں مسجد الحرام اور خانہ کعبہ واقع ہیں، جو مسلمانوں کے لیے قبلہ کی حیثیت رکھتے ہیں۔
رمضان کے دوران لاکھوں زائرین عمرہ اور عبادت کے لیے یہاں آتے ہیں، جبکہ مدینہ منورہ میں بھی مسجد نبوی اور دیگر مقدس مقامات کی زیارت کے لیے مسلمانوں کی بڑی تعداد پہنچتی ہے۔