اسرائیلی فوج کو مصنوعی ذہانت کی ٹیکنالوجی کی فراہمی کے خلاف احتجاج کرنے والے ملازمین کو مائیکروسافٹ نے برطرف کردیا۔
ٹیکنالوجی کمپنی مائیکروسافٹ کی 50 ویں سالگرہ کی تقریب کے دوران غزہ میں ہونے والے اسرائیلی مظالم اور مائیکروسافٹ کی جانب سے اسرائیلی فوج کو مصنوعی ذہانت کی ٹیکنالوجی کی فراہمی کے خلاف احتجاج کرنے والے ملازمین کر برطرف کردیا گیا۔
کمپنی کی 50 ویں سالگرہ کے موقع پر انجینیئر ابتھال ابوسعد نے مائیکرو سافٹ اے آئی کے سی ای او مصطفیٰ سلیمان کی تقریر کے دوران احتجاج کیا تھا۔
انکا کہنا تھا کہ آپ کا دعویٰ ہے کہ آپ اس بات کی فکر کرتے ہیں کہ مصنوعی ذہانت کو اچھائی کے لیے استعمال کیا جائے لیکن مائیکرو سافٹ اسرائیلی فوج کو مصنوعی ذہانت پر مبنی ہتھیار فروخت کرتا ہے، 50 ہزار لوگ مر چکے ہیں اور مائیکروسافٹ ہمارے خطے میں اس نسل کشی کو طاقت فراہم کررہا ہے۔
مائیکروسافٹ نے ابتھال پر تقریب میں خلل ڈالنے اور شہرت حاصل کرنے کی کوشش کا الزام لگاتے ہوئے انہیں بر طرف کیا۔
برطرف کی جانے والی دوسری ملازم وانیا اگروال کو بھی احتجاج کرنے پر رخصت سے 5 دن قبل ہی کمپنی چھوڑنے کا کہہ دیاگیا جبکہ کمپنی کے مطابق وانیا اگر وال پہلے ہی استعفادے چکی تھیں۔
مائیکروسافٹ کا کہنا ہے کہ احتجاج کا حق جائز ہے لیکن کاروباری رکاوٹیں ناقابل قبول ہیں۔
یاد رہے اس سے قبل بھی گوگل کے درجنوں ملازمین ایسے معاہدوں کے خلاف احتجاج کرنے پربرطرف کیے جا چکے ہیں۔