امریکا کے شہر ہیوسٹن میں پاکستانی ڈاکٹروں اور مشی گن یونیورسٹی میں فلسطین کی حمایت میں مظاہرہ کیا گیا۔
واشنگٹن ڈی سی کے یونین اسٹیشن پر غزہ غزہ کےنعرے لگائے گئے، شکاگو ٹریبیون آفس کےسامنے مظاہرین نے فلسطینی شہدا کے نام سے بھرے پوسٹرز کے ساتھ احتجاج کیا۔
برطانیہ بھر میں 100 سے زائد مقامات پر مظاہرے
غزہ پر صیہونی جارحیت کے خلاف برطانیہ بھر میں 100 سے زائد مقامات پر مظاہرے کیے گئے، برطانوی شہر برمنگھم میں فلسطین کی حمایت اور صیہونی جارحیت کےخلاف احتجاجی مظاہرہ کیا گیا، برمنگھم میں کیے گئے مظاہرے میں کنزرویٹو ایم پی شبانہ محمود کے خلاف نعروں والے پلے کارڈ بھی موجود تھے۔
احتجاج میں شامل مظاہرین کا کہنا تھا کہ جنگ بندی کے حق میں ووٹنگ نہ کرنے والے بھی فلسطین پر مظالم میں شریک ہیں، مظاہرے میں وزیراعظم رشی سونک اور کیئر اسٹارمر کے خلاف شیم آن یو کے نعرے لگائے گئے۔
بارسلونا میں فائر فائٹرز کی جانب سے فائرٹرک کے سائرن بجاکر فلسطینیوں کی نسل کشی روکنے اور صیہونی حکومت کو ہتھیاروں کی فراہمی پر پابندی عائد کا مطالبہ کیا گیا۔
جنگ میں اسرائیل کو یقینی شکست کا سامنا کرنا پڑے گا: ایرانی کمانڈر
لبنان، بحرین اور یونان کے شہر ایتھنز میں بھی صیہونی جارحیت کیخلاف احتجاج کیا گیا جبکہ یمن میں عوام کی بڑی تعداد نے فلسطین کے حق میں ریلی نکالی۔ قطر کے دارالحکومت دوحا اور عمان میں بھی صیہونی جارحیت کیخلاف مظاہرین سڑکوں پر نکلے۔
ایران کے دارالحکومت تہران میں بھی فلسطین کے حق میں بڑا مظاہرہ کیا گیاجس دوران ایرانی کمانڈر حسین سلامی نے خطاب میں کہا کہ جنگ میں صیہونی حکومت کو یقینی شکست کا سامنا کرنا پڑے گا، اسلامی دنیا جو کر سکی کرے گی، مسلمان عوام غزہ کے مظلوم عوام کی طرف سے بدلہ لیں گے۔