غزہ میں عارضی جنگ بندی کے پانچویں روز حماس نے 10 صیہونیوںاور 2 غیر ملکیوں سمیت 12 یرغمالی رہا کردیے۔
معاہدے کے تحت حماس کی جانب سے 10 صیہونیوںسمیت 12 افراد کو رہا کرنے کے بعد صیہونی حکومت کو بھی 30 فلسطینی قیدی رہا کرنے پڑے، صیہونی قید سے رہائی پانے والے فلسطینیوں میں 15 خواتین اور 15 مرد شامل ہیں۔
غزہ میں جاری حماس صیہونی حکومت لڑائی کے دوران عارضی جنگ بندی کے چار دنوں میں اب تک 50 صیہونی اور 150 فلسطینی قیدی رہا ہو چکے ہیں۔
غزہ میں صیہونی بربریت سے 7 اکتوبر سے اب تک شہید ہونے والے فلسطینیوں کی تعداد 15 ہزار سے تجاوز کر گئی ہے جبکہ صیہونی بمباری سے تباہ عمارتوں کے ملبے سے مزید 160 لاشیں برآمد ہوئی ہیں۔
دوسری جانب بیروت میں پریس کانفرنس کرتے ہوئے حماس کے سینیئر رہنما اور ترجمان اسامہ حمدان کا کہنا تھا کہ رہا ہونے والے فلسطینی قیدیوں نے بتایا ہے کہ صیہونی حکومت کا رویہ کتنا وحشیانہ تھا، صیہونی جیلوں میں فلسطینی قیدی نہ ہوتے تو ہمیں صیہونیوں کو یرغمالی بنانے کی ضرورت نہ ہوتی۔
حماس رہنما کا کہنا تھا کہ غزہ میں صیہونی حکومت اپنا کوئی بھی مقصد حاصل نہیں کرسکا، صیہونی حکومت غزہ میں عسکری اور سیاسی دونوں لحاظ سے بری طرح ناکام ہوا۔
ان کا کہنا تھا کہ زمینی کارروائی میں ہلاک صیہونی فوجیوں کی تعداد بتائی گئی تعداد سےکہیں زیادہ ہے، صیہونی حکومت کے ایک ہزار سے زیادہ فوجی زخمی ہوئے ہیں، زخمی صیہونی فوجیوں میں 200 شدید زخمی ہیں، دشمن کا نقصان آنے والے دنوں میں مزید بڑھے گا، صیہونی فوجی غزہ کی 80 فیصد سرزمین کو چھونے میں بھی ناکام رہے۔
ادھر مقبوضہ فلسطین میں جاری صیہونی مظالم سے متعلق اقوام متحدہ کا کہنا ہے کہ مقبوضہ مغربی کنارے میں صیہونی فوج کی کارروائیوں میں 7 اکتوبر سے اب تک 231 فلسطینی شہید ہوچکے ہیں، شہید فلسطینیوں میں 59 بچے بھی شامل ہیں۔
یورپی یونین کی جانب سے غزہ میں ایندھن کی فراہمی کا نیا مطالبہ کرتے ہوئے یورپی یونین کمشنر نے کہا کہ صیہونی حکومت کی غزہ میں ایندھن پر پابندیاں امداد کی فراہمی میں رکاوٹ بن رہی ہیں۔