مقبوضہ فلسطین کی مزاحمتی تنظیم حماس نے صیہونی حکومت کی جانب غزہ میں سب سے بڑی سرنگ تلاش کرنے کے فخریہ اعلان پر معنی خیز ردعمل دیا ہے۔
گزشتہ روز صیہونی حکومت نے دعویٰ کیا تھاکہ غزہ میں القسام بریگیڈز کے زیر استعمال سب سے بڑی سرنگ تلاش کرلی ہے اور یہ سرنگ 4 کلومیٹر طویل اور 165 فٹ گہرائی میں جاتی ہے جس میں بجلی کا نظام بھی موجود ہے۔
یہ سرنگ ایریز بارڈر کراسنگ اور صیہونی فوجی چھاؤنی کے قریب ہے۔ اس سرنگ کا صیہونی وزیر دفاع نے بھی دورہ کیا تھا۔ صیہونی حکومت فوج کے مطابق حماس نے اس سرنگ کو 7 اکتوبر کے حملوں میں استعمال کیا تھا۔
تاہم اب حماس کے عسکری ونگ القسام بریگیڈز نے سرنگ کی ویڈیو جاری کی ہے جس میں سے نکل کر مجاہدین نے صیہونی فوجی چھاؤنی پر حملہ کیا تھا اور کئی صیہونی فوجیوں کو ہلاک کیا تھا۔
اس کے ساتھ ہی مجاہدین مقبوضہ علاقوں میں داخل ہوئے تھے اور اس حملے میں صیہونی فوجی و پولیس اہلکاروں سمیت ایک ہزار سے زائد صیہونی ہلاک ہوئے تھے۔
ویڈیو کے ساتھ القسام بریگیڈز نے لکھاکہ ’بہت دیر کردی، ہمارا مشن تو مکمل ہوگیا‘۔
اس کے علاوہ القسام بریگیڈز نے صیہونی فوج پر راکٹوں، مارٹر گولوں سے حملوں کیے ہیں جس میں کئی صیہونی فوجی ہلاک ہوگئے جبکہ مرکاوا ٹینک اور بکتر بند گاڑیوں سمیت متعدد فوجی گاڑیاں تباہ کردیں۔
صیہونی فوج نے اتوار کو زمینی آپریشن میں مزید 5 فوجی اہلکاروں کی ہلاکت کا اعتراف کیا ہے جس کے بعد غزہ آپریشن میں مرنے والے فوجیوں کی تعداد 127 ہوگئی ہے۔