صیہونی مغویوں کو ادویات کی فراہمی سے متعلق حماس اور صیہونی حکومت کے درمیان معاہدہ طے پاگیا۔
صیہونی میڈیا کے مطابق صیہونی حکومت اور حماس میں معاہدہ قطر کی سفارتی کوششوں کے نتیجے میں طے پایا جس کے تحت حماس یرغمال صیہونی فوجیوں اور شہریوں کو علاج کی سہولت دے گا۔
صیہونی میڈیا کے مطابق معاہدے کے تحت صیہونی حکومت غزہ کے لیے امداد میں ادویات اور دیگر اشیا کی مقدار بڑھا دے گا۔
دوسری جانب غزہ وزارت صحت کے مطابق 7 اکتوبر سے جاری صیہونی حملوں میں 23 ہزار 708 فلسطینی شہید اور 60 ہزار سے زائد زخمی ہوئے ہیں۔
عرب میڈیا کے مطابق غزہ پٹی میں ایک بار پھر مکمل کمیونی کیشن بلیک آؤٹ کردیا گیا، صیہونی بمباری کی وجہ سے غزہ میں انٹرنیٹ اور ٹیلی کام سروسز معطل ہیں۔
صیہونی حکومت نے عالمی عدالت انصاف میں فلسطینیوں کی ہلاکتوں کا ذمہ دار حماس کو قرار دیدیا
صیہونی حکومت نے عالمی عدالت انصاف میں غزہ میں فلسطینیوں کی ہلاکتوں کا ذمہ دار فلسطین کی مزاحمتی تحریک حماس کو قرار دے دیا۔
جنوبی افریقا نے صیہونی حکومت پر غزہ میں فلسطینیوں کی نسل کشی کا الزام عائد کرکے عالمی عدالت انصاف (آئی سی جے) میں کیس دائر کیا ہوا ہے۔
نیدر لینڈز کے شہر دی ہیگ میں واقع عالمی عدالت انصاف میں صیہونی حکومت کے خلاف فلسطینیوں کی نسل کشی کے مقدمےکی دوسرے روز بھی سماعت ہوئی جس میں صیہونی حکومت نے اپنے دفاع میں دلائل دیے۔