عالمی عدالت انصاف کے بعد صیہونی حکومت کے خلاف جنگی جرائم کی تحقیقات کے لیے عالمی فوجداری عدالت میں بھی درخواست دائر کر دی گئی۔
غیر ملکی خبر ایجنسی کے مطابق میکسیکو اور چلی نے عالمی فوجداری عدالت میں صیہونی حکومت کے جنگی جرائم کے خلاف مشترکہ درخواست دائر کی ہے۔
میکسیکو اور چلی کی درخواست میں فلسطینیوں کے خلاف صیہونی جنگی جرائم کی تفتیش کا مطالبہ کیا گیا ہے۔
اس سے قبل جنوبی افریقا نے عالمی عدالت انصاف میں صیہونی حکومت کے فلسطینیوں کی نسل کشی کے خلاف درخواست دائر کی تھی جس پر سماعت بھی جاری ہے۔
دوسری جانب صیہونی حکومت اپنی ہٹ دھرمی پر قائم ہے اور صیہونی وزیراعظم بنیامین نیتن یاہو نے واضح طور پر کہا ہے کہ اقوام متحدہ یا کوئی اور طاقت ہمیں غزہ میں کارروائیوں سے نہیں روک سکتیں۔
7 اکتوبر سے غزہ میں جاری صیہونی کارروائیوں میں اب تک 25 ہزار کے قریب فلسطینی شہید اور 65 ہزار زخمی ہو چکے ہیں، اقوام متحدہ کے مطابق غزہ کی 85 فیصد آبادی صیہونی بمباری کے باعث بے گھر ہو چکی ہے، شدید سرد موسم، خوراک کی قلت اور بیماریوں کے باعث بمباری سے زیادہ فلسطینیوں کی ہلاکت کا خدشہ ہے۔