صیہونی حکومت نے دو ہفتے کے محاصرے کے بعد غزہ کےالشفا اسپتال سےاپنے فوجی اور ٹینک ہٹالیے۔
غزہ کی وزارت صحت کا کہنا ہے کہ صیہونی حکومت نے پیر کے روز الشفا اسپتال سے ٹینک اور فوجی گاڑیاں ہٹالی ہیں۔
حکومتی میڈیا آفس کے مطابق صیہونی حکومت نے انخلا کے وقت افواج کو تحفظ فراہم کرنے کے لیے اسپتال کے اطراف میں بمباری بھی کی۔
غزہ کی وزارت صحت نے اپنے بیان میں کہا ہے کہ الشفا میڈیکل کمپلیکس سے درجنوں لاشیں نکالی گئی ہیں جن میں کچھ خراب ہوچکی ہیں جب کہ صیہونی فوج نے جاتے جاتے کمپلیکس کی عمارتوں کو آگ لگادی اور اسے ناقابل استعمال بنادیا۔
وزارت صحت کے بیان میں کہا گیا ہے کہ میڈیکل کمپلیکس میں اندر اور اطراف کی عمارتوں میں بڑے پیمانے پر تباہی پھیلی ہوئی ہے۔
اسپتال کے ایک ڈاکٹر نے غیر ملکی خبر رساں ادارے کو بتایا کہ اسپتال سے 20 سے زائد لاشیں نکالی گئی ہیں جن میں سے کچھ کو صیہونی فوجی گاڑیوں نے کچل دیا ہے۔
دوسری جانب صیہونی حکومت نے بھی الشفا اسپتال سے افواج کے انخلا کی تصدیق کردی ہے۔
ایک بیان میں صیہونی فوج کا کہنا تھا کہ فوج نے دو ہفتے تک جاری رہنے والے آپریشن کے دوران مقابلے میں کئی مسلح افراد کو ہلاک کیا اور ہتھیار اور انٹیلی جنس معلومات قبضے میں لیں۔
خیال رہے کہ الشفا اسپتال میں مریضوں اور زخمیوں کے علاوہ ہزاروں بے گھر فلسطینی بھی پناہ لیے ہوئے تھے۔