تل ابیب: صیہونی پارلیمنٹ نے قطری نشریاتی ادارے الجزیرہ ٹی وی کو صیہونی حکومت میں بند کرنےکا قانون منظورکرلیا۔
غیر ملکی میڈیا کے مطابق صیہونی پارلیمنٹ نے ایک قانون کی منظوری دی ہے جس کے تحت حکومت سکیورٹی صورتحال کے تحت غیر ملکی نشریاتی اداروں کو بند کرنےکا اختیار رکھتی ہے۔
صیہونی وزیراعظم نیتن یاہو نے سوشل میڈیا پوسٹ میں اعلان کیا کہ الجزیرہ اب صیہونی حکومت میں نشر نہیں کیا جائےگا، نئے قانون کے مطابق فوری کارروائی ہوگی۔
برطانوی میڈیا کے مطابق صیہونی وزیراعظم طویل عرصے سے صیہونی حکومت مخالف ہونےکا الزام لگاتے ہوئے الجزیرہ کی نشریات بند کرنے کی کوشش کرتے رہے ہیں۔
غزہ میں صیہونی حملوں کے دوران الجزیرہ کے متعدد صحافی اور ان کے اہلخانہ شہید ہوچکے ہیں۔
گزشتہ سال 25 اکتوبر کو ایک فضائی حملے میں غزہ کے بیورو چیف کی اہلیہ، بیٹا، بیٹی، پوتا اور 8 دیگر رشتہ دار شہید ہوگئے تھے۔