شام کے دارالحکومت دمشق میں ایرانی سفارت خانے پر صیہونی جنگی طیاروں کی بمباری کے بعد صیہونی حکومت نے مختلف ممالک میں اپنے 28سفارتی مشن بند کر دیے۔
ایک امریکی اہلکار نے برطانوی نیوز ایجنسی کو بتایا کہ شام میں ایرانی سفارت خانے پر صیہونی حکومت کے حملے کے جواب میں ایران خطے میں صیہونی حکومت یا امریکی اثاثوں کو نشانہ بنانے کے ممکنہ حملے کی تیاری کر رہا ہے تاہم ہم یقینی طور پر چوکنا ہیں۔
سی این این کے مطابق آئندہ ہفتے ایران کی جانب سے صیہونی حکومت پر حملہ ہو سکتا ہے، امریکا ہائی الرٹ ہے، دمشق میں ایرانی سفارت خانے پر صیہونی جنگی طیاروں کی بمباری کے بعد ایران نے کہا کہ وہ فیصلہ کن ردعمل کا حق محفوظ رکھتا ہے۔
سی این این کے مطابق شام میں قونصل خانے پر حملے کے خلاف ایران صیہونی سفارتی مرکز نشانہ بنا سکتا ہے، حملوں میں ڈرونز کے ساتھ کروز میزائل بھی استعمال کیا جا سکتا ہے۔
صیہونی حکام نے ایران کی دھمکیوں کے باعث مختلف ممالک میں تقریباً 28 سفارتی مشن بند کر دیے ہیں۔
صیہونی میڈیا کے مطابق حکومت نے اپنے سفارت خانوں میں تیاری کا اعلان کیا ہے اور مصر، اردن، بحرین، مراکش، ترکمانستان، انقرہ اور استنبول میں اپنے نمائندہ دفاتر کو خالی کرالیا ہے۔
صیہونی ذریعے نے تاس کو بتایا کہ صیہونی سفارتخانوں کے انخلا کی خبریں غلط ہیں۔ اسکائی نیوز عربیہ کی رپورٹ کے مطابق، صیہونی حکومت نے ایران کی دھمکیوں کے بعد دنیا بھر کے ممالک میں 28 سفارت خانوں کی کارروائیاں معطل کر دی ہیں۔ایران کی جانب سے دمشق میں اپنے قونصل خانے پر صیہونی حملے کا جواب دینے کی دھمکی کے بعد 28 سفارتی مشن بند کر دیے گئے تھے۔
صیہونی وزارت خارجہ نے قانون نافذ کرنے والے اداروں کے ساتھ مشاورت کے بعد فیصلہ کیا ہے کہ دمشق حملے پر ایران کے متوقع ردعمل کے لیے بے مثال تیاری کے حصے کے طور پر متعدد سفارت خانوں کو خالی کر دیا جائے۔
صیہونی حکومت ڈیفنس فورسز کے ترجمان نے کہا کہ ملک کی فوج کسی بھی پیش رفت کے لیے ہائی الرٹ ہے۔ صیہونی وزارت خارجہ کے ترجمان نے متعدد سفارت خانوں سے اہلکاروں کے انخلاء کے بارے میں میڈیا رپورٹس پر تبصرہ کرنے کی درخواست کو مسترد کر دیا۔
4 اپریل کو ایرانی سپریم لیڈر آیت اللہ علی خامنہ ای نے X سوشل میڈیا پلیٹ فارم پر عبرانی زبان میں لکھا کہ وہ صیہونی حکومت کو دمشق میں تہران کے قونصلر دفتر پر فضائی حملہ کرنے کے فیصلے پر سبق سکھائیں گے، جس میں دو پاسداران انقلاب کے دو اہلکاروں سمیت 13 افراد جاں بحق ہوئے تھے۔