فلسطینی مزاحمتی تنظیم حماس نے کہا ہے کہ رفح میں آپریشن صیہونی فوج کے لیے پکنک ثابت نہیں ہوگا۔
صیہونی فوج کی رفح میں زمینی آپریشن کی تیاریوں پر ردعمل دیتے ہوئے حماس کا کہنا ہے کہ اپنے لوگوں کے دفاع کے لیے پوری طرح تیار ہیں۔
حماس کے رہنما عزت الرشق نے کہا کہ رفح میں صیہونی حکومت کا زمینی آپریشن جنگ بندی مذاکرات کو خطرے میں ڈال دےگا۔
حماس نے عالمی برادری سے مطالبہ کیا ہے کہ وہ رفح میں صیہونی آپریشن رُکوانے کے لیے فوری اقدامات کرے۔
خیال رہے کہ صیہونی فوج نے رفح میں پناہ لینے والے عام شہریوں کو فوری علاقہ چھوڑنے کے احکامات جاری کردیے ہیں جس کے نتیجے میں مشرقی رفح سے شہریوں نے انخلا شروع کردیا ہے۔
غزہ میں صیہونی حملوں سے خوفزدہ 15 لاکھ فلسطینی شہریوں نے رفح میں پناہ لے رکھی ہے۔
صیہونی فوج کے ترجمان کا کہنا ہےکہ ہم متوقع زمینی آپریشن سے پہلے مشرقی رفح سے ایک لاکھ لوگوں کو نکال رہے ہیں۔
غیر ملکی خبر رساں ادارے کے مطابق مصر نے بھی رفح میں متوقع صیہونی آپریشن کے پیش نظر شمالی صحرائے سینا میں غزہ کی سرحد کے ساتھ اپنی فوج کو ہائی الرٹ کردیا ہے۔
یاد رہے کہ عالمی برداری پہلے ہی صیہونی حکومت کو رفح میں زمینی آپریشن کی صورت میں تباہ کن نتائج سے خبردار کرچکی ہے۔