صہیونی میڈیا نے جنگ کے بعد غزہ میں ایک نئی صیہونی فوجی حکومت قائم کرنے کے منصوبے کا انکشاف کیا ہے، جس پر صیہونی ایوانوں میں مباحثہ بھی جاری ہے۔
صیہونی اخبار ”ٹائمز آف اسرائیل“ کے مطابق سینئیر سکیورٹی حکام نے حال ہی میں حماس کے ساتھ جنگ کے خاتمے کے بعد غزہ کی پٹی میں صیہونی فوجی حکومت کے قیام کی لاگت کا تخمینہ لگایا۔
اندازے کے مطابق یہ لاگت 20 ارب شیکل سالانہ تک پہنچ سکتی ہے۔
اخبار نے ایک سرکاری رپورٹ کا حوالہ دیتے ہوئے لکھا کہ فوجی حکومت کے قیام کے اخراجات کے علاوہ صیہونی حکومت کو ایک ایسی قیمت بھی ادا کرنی پڑے گی جو ابھی تک پٹی میں بنیادی ڈھانچے کی تعمیر نو کے لیے طے نہیں کی گئی ہے۔
رپورٹ میں یہ بھی کہا گیا کہ فوجی حکومت میں کام کرنے کے لیے تقریباً 400 افراد کی ضرورت ہوگی۔
اس کے علاوہ غزہ میں صیہونی فوج کی پانچ بٹالین بھی غزہ میں باقی رہیں گی، جس کے لیے صیہونی حکومت کو شمالی محاذ اور مغربی کنارے میں اپنے فوجیوں کی تعداد کم کرنا پڑے گی۔