سابق امر یکی صدرڈونلڈ ٹرمپ نے کہا کہ وہ نیویارک کی جیوری کے ذریعے اپنی تاریخی سزا کے بعد گھر یا جیل میں قید کو قبول کریں گے لیکن عوام کیلئے اسے قبول کرنا مشکل ہوگا۔
ٹی وی انٹر ویو میں اپنی گرفتاری کی صورت میں شدید عوامی ردعمل کا عندیہ دیتے ہوئے سابق امریکی صدر کا کہنا تھا کہ آپ کو معلوم ہونا چاہیے کہ ایک خاص موڑ آجانے کے بعد ایک بریکنگ پوائنٹ بھی آتا ہے۔
ڈونلڈ ٹرمپ کا کہنا تھا کہ وہ نومبر میں ہونے والے امریکی صدارتی انتخابات جیت کر اپنا بدلہ چکائیں گے۔
واضح رہے کہ چند روز قبل امریکی عدالت نے فحش اداکارہ کو رقم کی ادائیگی سے متعلق کیس میں ٹرمپ پر عائد الزامات کو درست قرار دیتے ہوئے امریکا کی تاریخ میں پہلی بار کسی سابق صدر کو سزا سنا دی۔
امریکی عدالت نے سابق صدر ڈونلڈ ٹرمپ کو کاروباری ریکارڈ میں جعلسازی پر سزا سنائی جس کا اعلان جج 11 جولائی کو کریں گے۔
ڈونلڈ ٹرمپ کو نیویارک کی جیوری نے سزا سنائی، ڈونلڈ ٹرمپ پر فحش فلموں کی اداکارہ اسٹارمی ڈینئلز کو 1 لاکھ 30 ہزار ڈالر کی ادائیگی سے متعلق 34 الزامات عائد کیے گئے تھے، جیوری نے تمام 34 الزامات کو درست قرار دیا۔
سابق امریکی صدر ڈونلڈ ٹرمپ کو 2020 کے انتخابات میں نتائج بدلنے کی کوشش سے متعلق جارجیا کیس سمیت مزید تین کرمنل مقدمات اور فلوریڈا میں خفیہ دستاویزات سے متعلق مس ہینڈلنگ کے مقدمے کا بھی سامنا ہے۔