بھارتیہ جنتا پارٹی نے انتخابی اتحاد نیشنل ڈیموکریٹک الائنس کے ساتھ مل کر حکومت بنانے کا اعلان کیا ہے اور باضابطہ طور پر بھارتی صدر کی جانب سے نریندر مودی کو وزرات عظمیٰ کا حلف اٹھانے کی دعوت دے دی گئی ہے۔
نریندر مودی اتوار کی شام مسلسل تیسری بار وزارت عظمیٰ کا حلف اٹھائیں گے اور تقریب حلف برداری کیلئے نئی دہلی میں انتظامات کیے جا رہے ہیں۔ اعلیٰ سرکاری حکام نے کہا ہے کہ پاکستان نریندر مودی کے حلف کے بعد انہیں مبارکباد دے گا۔
واضح رہے کہ بھارت میں لوک سبھا کے انتخابات میں بی جے پی کے اتحاد این ڈی اے نے 294 نشستیں حاصل کیں جبکہ اپوزیشن اتحاد ’انڈیا‘ نے 234 سیٹیں جیت کر سب کو حیران کردیا۔
ہندوستان کے وزیر اعظم نریندر مودی کی قیادت میں قومی جمہوری اتحاد (این ڈی اے) کی نئی حکومت کی اتوار کی شام تقریب حلف برداری ایوان صدر راشٹریہ پتی بھون میں منعقد ہونے جا رہی ہے جس میں شرکت کے لئے نیپال، بھوٹان، بنگلہ دیش، سری لنکا، مالدیپ، سیشلز اور ماریشس کے رہنماؤں کو دعوت نامہ بھیجا گیا ہے۔
نیپال کے وزیر اعظم پشپا کمل دہل پرچنڈ، بھوٹان کے وزیر اعظم شیرنگ ٹوبگے، بنگلہ دیش کی وزیر اعظم شیخ حسینہ، سری لنکا کے صدر رانیل وکرما سنگھے، مالدیپ کے صدر محمد معیزو، سیشلز کے صدر ویول رامکلوان، ماریشس کے وزیر اعظم پروِند جگناتھ کے آنے کا امکان ہے۔
ذرائع کے مطابق مہمان قائدین کی آمد کا سلسلہ آج ہفتہ سے شروع ہو رہا ہے جبکہ سرکاری ذرائع کا کہنا ہے کہ پیر کو وزیراعظم مودی ان کے ساتھ دو طرفہ ملاقات اور گفتگو بھی کریں گے۔