ہزاروں افراد نے امریکی کانگریس میں صیہونی وزیر اعظم کی تقریر کے دوران کانگریس کی عمارت کے باہر مظاہرہ کر کے غزہ میں صیہونی حکومت کے جرائم اور مظالم کے خاتمے کا مطالبہ کیا ہے۔
فلسطین کے ہزاروں حامیوں نے بدھ کی شام کو صیہونی وزیراعظم نیتن یاہو کے خلاف احتجاجی مظاہرے کئے۔ واشنگٹن ڈی سی کی سڑکوں پر ہزاروں مظاہرین اس وقت احتجاج کرتے ہوئے نکل آئے جب نیتن یاہو امریکی کانگریس سے خطاب کی تیاری کر رہے تھے۔
امریکی مسلمانوں اور فلسطینیوں کے علاوہ کئی یہودی غیر سرکاری تنظیموں اور انسانی حقوق کے کارکنوں نے بھی جو نیتن یاہو کی پالیسیوں کی مخالفت کرتے ہیں، اس احتجاجی مظاہرے میں حصہ لیا۔ مظاہرین نے ایسے ایسے بینرز اٹھا رکھے تھے جن پر "غزہ میں فوری جنگ بندی”، "جنگی مجرم” اور "آزاد فلسطین” جیسے جملے درج تھے۔