فلسطینی مزاحمتی تنظیم حماس کا کہنا ہےکہ صیہونی حکومت 100 روز بعد بھی بزور طاقت یرغمالیوں کو رہا کرانے میں ناکام رہا ہے، صیہونی یرغمالیوں کی رہائی کے لیے صیہونی حکومت کو معاہدہ کرنا پڑےگا۔
روسی خبر ایجنسی سےگفتگو کرتے ہوئے سینیئر حماس رہنما موسیٰ ابومرزوق نےکہا کہ صیہونی حکومت معاہدے کے ذریعے یرغمالیوں کو واپس لےگا یا ان کی لاشیں لےگا، صیہونی حکومت یرغمالیوں کو معاہدے کے تحت ہی رہا کرا سکتا ہے۔
موسیٰ ابومرزوق کا کہنا تھا کہ حوثی فلسطینیوں کے ساتھ حقیقی اور مؤثر یکجہتی کا مظاہرہ کر رہےہیں۔
ان کا کہنا تھا کہ تمام قوتیں غزہ میں نسل کشی بند کرانے کے لیےجرأت مندانہ اقدامات کریں۔
دوسری جانب غزہ کے رہائشی علاقوں اور اسپتالوں کے اطراف صیہونی فوج کی شدید بمباری جاری ہے۔
7 اکتوبر سے اب تک شہدا کی تعداد 25 ہزار تک پہنچ گئی ہے، شہید ہونے والوں میں 70 فیصد خواتین شامل ہیں۔
اقوام متحدہ کا کہنا ہے غزہ میں ہرگھنٹے میں 2 مائیں شہید ہو رہی ہیں۔
خان یونس میں نصر اور الامل اسپتال کے قریب فلسطینی مزاحمت کاروں اور صیہونی فوج کے درمیان جھڑپوں کاسلسلہ جاری ہے۔
ادھر صیہونی فوج نے مغربی کنارے سے بھی 22 فلسطینیوں کو حراست میں لے لیا ہے۔
امریکی صدر بائیڈن نےکہا ہےکہ نیتن یاہوکی موجودگی میں بھی دو ریاستی حل ممکن ہے۔
خیال ہےکہ گزشتہ روز نیتن یاہو نے دو ریاستی حل کے امریکی مطالبے کی مخالفت کرتے ہوئے اسے صیہونی حاکمیت کے نظریےکے خلاف قرار دیا تھا۔