پاکستان برطانیہ کو 94 فیصد مصنوعات ڈیوٹی فری برآمد کر ے گا
برطانیہ نے پاکستان سمیت 65 ملکوں کیلئے نئی ٹریڈنگ اسکیم پرعملدرآمد کر دیا
اسلام آباد (شوریٰ نیوز)پاکستان برطانیہ کو 94 فیصد مصنوعات ڈیوٹی فری برآمد کر ے گا،برطانیہ نے پاکستان سمیت 65 ملکوں کیلئے نئی ٹریڈنگ اسکیم پرعملدرآمد کر دیا ، جی ایس پی کی جگہ نئی ٹریڈنگ اسکیم کے تحت پاکستان کی 94 فیصد مصنوعات کو برطانوی مارکیٹ تک ڈیوٹی فری رسائی مل گئی۔ برطانیہ نے پاکستان سمیت 65 ملکوں کے لیے نئی ٹریڈنگ اسکیم پرعملدرآمد کا آغاز کر دیا ہے جس کے تحت پاکستان کی 94 فیصد مصنوعات کو برطانوی مارکیٹ تک ڈیوٹی فری رسائی مل گئی ہے۔ڈیوٹی فری رسائی مل جانے کے بعد پاکستان کو ٹیرف کی مد میں 12 کروڑ برطانوی پاؤنڈ کی بچت ہو گی۔ اسکیم سے فائدہ اٹھانے کے لیے ہیومن اورلیبررائٹس پرعمل درآمد یقینی بنانا ضروری ہے۔نئی اسکیم کے تحت پاکستان، برطانیہ کو 94 فیصد مصنوعات ڈیوٹی فری ایکسپورٹ کر سکے گا جبکہ مزید 156 مصنوعات پر بھی ٹیرف ہٹائے جانے کا امکان ہے۔برطانوی ہائی کمیشن کے مطابق پاکستان اور برطانیہ کے درمیان تجارت کا موجودہ حجم 4.4 ارب پاؤنڈ ہے جس میں مزید اضافہ متوقع ہے۔ نئی اسکیم پاکستان اور برطانیہ کے تجارتی تعلقات میں بڑی پیش رفت ہے۔نئی اسکیم سے37 افریقی اور 26 ایشیائی ملکوں کو فائدہ ہو گا۔ ان ملکوں کی برطانیہ کو مجموعی برآمدات کا حجم 21 ارب پاؤنڈ ہے۔