زرمبادلہ کے مجموعی ذخائر9 ارب 83 کروڑ ڈالر رہے،اسٹیٹ بینک

کراچی(شوریٰ نیوز) زرمبادلہ کے مجموعی ذخائر9 ارب 83 کروڑ ڈالر رہے، 7 جولائی تک زرمبادلہ کے سرکاری ذخائر میں 6 کروڑ 10 لاکھ ڈالر اضافہ ہوا ،اسٹیٹ بینک کے مطابق 7 جولائی تک زرمبادلہ کے مجموعی ذخائر کی مالیت9 ارب 83 کروڑ 85 لاکھ ڈالر ریکارڈ کی گئی۔مرکزی بینک کے جاری کردہ اعدادوشمار کے مطابق 7 جولائی تک زرمبادلہ کے سرکاری ذخائر میں 6 کروڑ 10 لاکھ ڈالر اضافہ ہوا جس کے بعد سرکاری ذخائر 4 ارب 52 کروڑ ڈالر کی سطح پر پہنچ گئے۔اعدادوشمار کے مطابق کمرشل بینکوں کے پاس 5 ارب 31 کروڑ45 لاکھ ڈالر کے ذخائر موجود ہیں۔ اس طرح گذشتہ ہفتے زرمبادلہ کے مجموعی ذخائر کی مالیت 9 ارب 83 کروڑ 85 لاکھ ڈالر ریکارڈ کی گئی۔اسٹیٹ بینک کے مطابق گذشتہ ہفتے کے دوران سعودی عرب سے موصولہ 2 ارب ڈالر، متحدہ عرب امارات سے ایک ارب ڈالر اور آئی ایم ایف سے موصولہ ایک ارب 20 کروڑ ڈالر کو شامل کرکے سرکاری ذخائر 8 ارب 70 کروڑ ڈالر سے تجاوز کرگئے ہیں۔تاہم اسٹیٹ بینک کا کہنا ہے کہ 4 ارب 20 کروڑ ڈالر کے یہ انفلوز آئندہ ہفتہ کی زرمبادلہ کی رپورٹ میں شامل کیے جائیں گے۔