سینئر صوبائی وزیر شرجیل انعام میمن نے کہا کہ سندھ میں توانائی بحران ختم کرنے کیلئے وسیع وسائل موجود ہیں۔سینئر وزیر شرجیل انعام میمن نے کہاکہ وفاقی پالیسیوں نے سندھ کے توانائی شعبے کی ترقی کو متاثر کیا ہے، اگر وسائل اور سہولتیں دی جائیں تو سندھ میں توانائی انقلاب ممکن ہے، تھر کے کوئلے میں پاکستان کی بجلی کی ضروریات پوری کرنے کی زبردست صلاحیت ہے۔
شرجیل میمن نے کہا کہ صوبائی حکومت نے سولر انرجی منصوبوں کے لئے 2.5 ارب روپے کا بجٹ مختص کیا ہے اور تھر کے مستحق رہائشیوں کے لئے 200 یونٹ تک بجلی کے بل صوبائی حکومت ادا کر رہی ہے۔شرجیل انعام میمن نے کہا کہ گزشتہ چھ برسوں کے دوران تھر کول منصوبے کے تحت 30 ملین ٹن کوئلہ مختلف آزاد پاور پروڈیوسرز (IPPs) کو فراہم کیا گیا، کوئلے سے 31 گیگا واٹ بجلی پیدا کی گئی، اس بجلی سے تقریباً 30 لاکھ گھروں کو بجلی مہیا ہوئی، تھر کے کوئلے میں اتنی صلاحیت ہے کہ یہ آئندہ کئی دہائیوں تک پاکستان کی بجلی کی ضروریات پوری کر سکتا ہے۔
انہوں نے کہا کہ سندھ حکومت کی کاوشوں سے 105 کلومیٹر طویل ریلوے لائن تعمیر کی جا رہی ہے، یہ ریلوے لائن تھر کول کو قومی اور عالمی منڈیوں سے جوڑ دے گی، سندھ نے متبادل توانائی کے شعبے میں بھی اہم اقدامات کئے ہیں، سندھ کا ونڈ کوریڈور فعال ہے۔