سابق وزیراعلیٰ سندھ اور رہنما پیپلز پارٹی مراد علی شاہ نے ایم کیو ایم پاکستان کو تنقید کا نشانہ بناتے ہوئے کہا کہ ایم کیو ایم ایک مردہ گھوڑا بن چکی ہے، اسے خوراک دے کر دوبارہ زندہ کرنے کی کوشش کی جا رہی ہے۔
میڈیا سے گفتگو کرتے ہوئے سابق وزیراعلیٰ سندھ مراد علی شاہ نے کہا کہ الیکشن کی موجودہ صورتحال میں ایک ہی لیڈر ہے جو پورے پاکستان میں جلسے کر رہا ہے، بلاول بھٹو زرداری واحد لیڈر ہیں جو اپنا پروگرام اور اپنی سوچ عوام کو بتا رہے ہیں، باقی تو ماضی میں پھنسے ہوئے ہیں کہ مجھے کیوں نکالا۔
کراچی کی صورتحال پر گفتگو کرتے ہوئے مراد علی شاہ نے کہا کہ میں جب کراچی میں اسکول میں ہوتا تھا تو بھتہ کے بغیر کراس نہیں کر سکتے تھے، اب یہ دور ہے کہ دوسروں سے بھیک مانگ رہے ہیں کہ ہمیں الیکشن جتوا دو۔
سابق وزیر اعلیٰ سندھ نے کہا کہ ایم کیو ایم ایک مردہ گھوڑا بن چکی ہے اسے خوراک دے کر زندہ کرنے کی کوشش کی جا رہی ہے، ایم کیو ایم وہ جماعت ہے جن کو ادھر کہیں تو ادھر اور ادھر کہیں تو ادھر ہو جاتی ہے، ان لوگوں کو ووٹ نہ دیں جو آپ کا ووٹ ضائع کر دیں۔