مقبوضہ کشمیر میں بھارتی فوج کو کہیں قدرتی آفت تو کہیں ناگہانی واقعات میں شدید جانی اور مالی نقصان کا سامنا کر پڑ رہا ہے۔
بھارتی میڈیا کے مطابق ضلع لداخ میں واقع فوجی کیمپ میں اچانک آگ بھڑک اُٹھی۔ جس سے وہاں موجود افسران اور اہلکاروں کی دوڑیں لگ گئیں۔
میڈیا کو بھی اس واقعے کی کوریج سے روک دیا گیا۔ ایمبولینسوں کو جائے وقوعہ کی جانب جاتے ہوئے دیکھا گیا ہے۔
تاحال بھارتی فوج نے آگ لگنے کی وجہ اور حادثے میں ہونے والے جانی اور مالی نقصان سے متعلق کچھ نہیں بتایا۔
دوسری جانب ایک ٹریفک حادثے میں ایک اہم سیکیورٹی مہم کے لیے جموں سے سرینگر جانے والا بھارتی فوج کا ٹرک 600 فٹ گہری کھائی میں جا گرا۔
یہ حادثہ بھارتی فوج کے ٹرک کے ایک خطرناک موڑ کاٹتے ہوئے چشمہ کے قریب سڑک سے پھسل کر گرنے سے پیش آیا۔
مقبوضہ کشمیر کی پولیس، فوج، اسٹیٹ ڈیزاسٹر ریسپانس فورس (SDRF) اور سول کیو آر ٹی رامبن رضاکاروں پر مشتمل ٹیم نے ریسکیو آپریشن میں حصہ لیا۔
امدادی ٹیم جب جائے حادثہ پر پہنچی تو بھارتی فوج کے تینوں اہلکار مردہ حالت میں ملے۔ جنھیں اسپتال منتقل کردیا گیا۔
حادثے میں ہلاک ہونے والے افراد کی شناخت امیت کمار، سوجیت کمار اور من بہادر کے نام سے ہوئی ہے۔
لاشوں کو ضروری کارروائی کے بعد اُن کے آبائی علاقے روانہ کردیا گیا۔
تاحال حادثے کی وجہ کا تعین نہیں ہوسکا تاہم عینی شاہدین کا کہنا ہے کہ حادثہ ڈرائیور کی تیز رفتاری کے باعث پیش آیا تھا۔
بھارتی فوج کی جانب سے واقعے کی تحقیقات کے لیے ایک انکوائری کمیٹی تشکیل دیدی گئی تاہم ایسی کسی کمیٹی سے کبھی کوئی نتیجہ برآمد نہیں ہوا۔