صیہونی فضائیہ نے جنوبی لبنان میں حزب اللہ کے ٹھکانوں کو نشانہ بنانے کا دعویٰ کردیا ہے۔
صیہونی حکومت کا کہنا ہے کہ جنوبی لبنان سے اینٹی ٹینک میزائل داغنے کے بعد جوابی کارروائی کرتے ہوئے صیہونی فضائیہ کی جانب سے حزب اللہ کے ٹھکانو ں کو نشانہ بنایا گیا ہے۔
امریکی خبر ایجنسی کے مطابق صیہونی حملوں میں زخمیوں یا اموات سے متعلق تفصیلات سامنے نہیں آ سکیں ہیں تاہم حزب اللہ کی جانب سے صیہونی حکومت کے سرحدی علاقے میں داغے گئے میزائل سے 7 صیہونی فوجی ہلاک جبکہ 10 زخمی ہوگئے تھے۔
لبنانی مزاحمتی تنظیم حزب اللہ کا کہنا تھا کہ اتوار کے روز لبنانی سرحد کے قریب جاسوسی آلات نصب کرنے والی صیہونی ٹیم پر حملہ کیا گیا تھا جبکہ صیہونی حکومت کی جانب سے دعویٰ کیا گیا کہ حملہ ٹرانسمیشن لائن کی مرمت کرنے والے سویلین ورکرز پر کیا گیا ہے۔
ادھر لبنان میں موجود حماس کی القسام بریگیڈز کی ونگ نے بھی صیہونی حکومت پر حملے کیے، صیہونی حکام کے مطابق اتوار کے روز لبنانی علاقوں سے صیہونی سرحد پر 15 راکیٹ فائر کیے گئے۔
حماس کی القسام بریگیڈز نے راکیٹ فائر کرنے کی ذمہ داری قبول کرتے ہوئے کہا کہ غزہ میں صیہونی حکومت کی جارحیت کے جواب میں صیہونی شہر نہاریہ، شلومی اور حیفہ پر حملے کیے گئے تھے۔
خیال رہے کہ 7 اکتوبر کو فلسطین پر صیہونی حملوں کے آغاز کے بعد لبنانی مزاحمتی تنظیم حزب اللہ کی جانب سے بھی صیہونی سرحد پر حملوں کا سلسلہ جاری ہے۔
دوسری جانب غزہ پر صیہونی حملوں میں شہید فلسطینیوں کی تعداد 11 ہزار 100 سے تجاوز کر چکی ہے جبکہ شہید ہونے والوں میں 4 ہزار 500 سے زائد بچے بھی شامل ہیں۔