ایران نے صیہونی حکومت پر حملوں کے بعد اردن کیخلاف کارروائی کرنے کا بھی اشارہ دے دیا۔
ایران نے اردن کو خبردار کرتے ہوئے کہا کہ صیہونی حکومت کی حمایت کرنے والوں کے خلاف بھی کارروائی کریں گے کیونکہ ایران کے متعدد ڈرونز کو اردن کے طیاروں نے تباہ کیا تھا۔
ایرانی پاسدران انقلاب نے امریکا کو بھی صیہونی حکومت کی حمایت نہ کرنے کا مشورہ دیتے ہوئے کہا کہ امریکا ایران کے مفادات کو نقصان نہ پہنچائے۔
ایران کے حملے کے بعد صیہونی لڑاکا طیارے غزہ سے نکل گئے، غزہ جنگ کے بعد یہ پہلا موقع ہے کہ صیہونی لڑاکا طیارے غزہ میں موجود نہیں ہیں۔
خیال رہے کہ ایران نے صیہونی حکومت کی جانب سے دمشق میں یکم اپریل کو ایرانی قونصل خانے پر کیے گئے حملے کے جواب میں صیہونی حکومت پر ڈرون اور بیلسٹک میزائلوں سے حملہ کیا۔
ایرانی میڈیا کے مطابق ایران کے 50 فیصد میزائلوں نے اہداف کو نشانہ بنایا جبکہ صیہونی حکومت اور امریکا کا کہنا ہے کہ ایران کی جانب سے فائر کیے گئے زیادہ تر میزائلوں کو مار گرایا گیا۔