فلسطین مزاحمتی تنظیم حماس نے سیز فائر کی پیشکش پر صیہونی حکومت کا جواب موصول ہونے کی تصدیق کردی ہے۔
عرب میڈیا کے مطابق حماس کے ڈپٹی چیف کی جانب سے جاری بیان میں بتایا گیا ہےکہ حماس کو ہفتے کے روز سیز فائر پیشکش کا صیہونی حکام کی طرف سے باضابطہ جواب موصول ہوا ہے۔
حماس کا کہنا ہےکہ صیہونی جواب کا جائزہ لے کر اس پر کوئی بھی ردعمل دیا جائے گا۔
قطر میں موجود حماس کے رہنما خلیل الحیا نے کہا کہ صیہونی قابض صیہونی حکومت کو ثالث کار قطر اور مصر نے 13 اپریل کو سیز فائر کی پیشکش کی تھی جس پر حماس کو آج باضابطہ طور پر صیہونی حکومت کا جواب موصول ہوا ہے۔
واضح رہےکہ غزہ میں گزشتہ 6 ماہ سے جاری صیہونی بربریت کے دوران مذاکرات مسلسل تعطل کا شکار رہے ہیں جب کہ حماس نے جنگ کے خاتمے کے لیے اپنے مطالبات پر مضبوطی کے ساتھ کھڑے رہنے کا اعلان کررکھا ہے۔
غزہ میں گزشتہ سال اکتوبر سے جاری صیہونی حملوں میں اب تک 34 ہزار کے قریب فلسطینی شہید ہوچکے ہیں جن میں زیادہ تعداد بچوں اور خواتین کی ہے، اس کے علاوہ غزہ میں خوراک کی شدید قلت اور امراض پھوٹنے کی وجہ سے بھی بچوں کی اموات میں اضافہ ہورہا ہے۔