شمالی صیہونی حکومت پر حزب اللہ کے میزائل اور ڈرون حملوں میں 2 صیہونی ہلاک اور 20 سے زائد زخمی ہوگئے۔
حزب اللہ کے مزاحمت کاروں کی جانب سے صیہونی علاقے کریات شمونہ پر بھی ٹینک شکن میزائل سے حملہ کیا گیا جس سے ایک مکان میں آگ لگ گئی۔
صیہونی وزیراعظم نیتن یاہو نے حملے سے کچھ گھنٹے پہلے ہی فوجی تیاریوں کا جائزہ لینے کیلئے کریات شمونہ کا دورہ کیا تھا۔
دوسری جانب غزہ میں صیہونی فوج کے حملوں کا سلسلہ بھی جاری ہے، گزشتہ 24 گھنٹوں میں مزید 70 سے زائد فلسطینی شہید ہوگئے۔
اقوام متحدہ کے مطابق الاقصیٰ اسپتال میں سینکڑوں مریص لائے جا رہے ہیں جن میں اکثریت جھلسنے، ہڈیاں ٹوٹنے، یا دھار دار چیز سے شدید زخمی ہونے والے افراد کی ہے۔
اقوام متحدہ نے خبردار کیا ہے کہ غزہ میں امداد کی رسائی پر صیہونی پابندیوں کی وجہ سے جولائی میں 10 لاکھ سے زیادہ فلسطینی بدترین بھوک کا شکار ہوسکتے ہیں۔
غزہ کے محکمہ صحت کے مطابق صیہونی حملوں میں گزشتہ 24 گھنٹوں کے دروان 115 سے زائد افراد زخمی ہوئے ہیں۔
ادھر یورپی ملک سلووینیا کی پارلیمنٹ نے بھی فلسطین کو ریاست تسلیم کرنے کی منظوری دے دی ہے، سلووینیا کیساتھ فلسطین کو تسلیم کرنے والے ممالک کی تعداد 146 ہوگئی۔
واضح رہے کہ 7 اکتوبر 2023 سے اب تک غزہ پر صیہونی حکومت کے وحشیانہ حملوں میں 36 ہزار 586 سے زائد فلسطینی شہید جبکہ 83 ہزار 74 افراد زخمی ہو چکے ہیں، شہید اور زخمیوں میں نصف سے زائد تعداد صرف بچوں اور خواتین پر مشتمل ہے۔