کینیڈا کے جنگلات میں آگ لگنے سے امریکا میں بھی فضائی آلودگی

ٹورانٹو(شوریٰ نیوز)کینیڈا کے جنگلات میں آگ لگنے سے امریکا میں بھی فضائی آلودگی ،کینیڈا میں 400 سے زیادہ مقامات پر جنگلات میں آگ لگی ہوئی ہے ، امریکا میں بھی شدید فضائی آلودگی کا انتباہ جاری کر دیا گیا۔کینیڈین حکام کے مطابق کینیڈا میں 400 سے زیادہ مقامات پر جنگلات میں آگ لگی ہوئی ہے،250 مقامات پر آگ قابو سے باہر ہے، اب تک 65 لاکھ ایکڑ رقبہ جل چکا ہے۔ آگ لگنے سے کینیڈا کے دارالحکومت اوٹاوا اور سب سے بڑے شہر ٹورانٹو میں بھی ہوا کا معیار شدید متاثر ہوا ہے۔ ،موسمیاتی تبدیلیوں سے گرم اور خشک موسم کا خطرہ بڑھ رہا ہے۔دوسری جانب کینیڈا کے جنگلات میں آگ سے امریکا کو شدید فضائی آلودگی کا سامنا ہے، اس حوالے سے حکام نے انتباہ بھی جاری کر دیا ہے۔نیو یارک میں ہوا کا معیار ریکارڈ بدترین سطح پر پہنچ گیا، گورنر نیویارک نے فضائی آلودگی کو ہنگامی بحران قرار دے دیا۔نیویارک نیویارک میں چڑیا گھر، پارکس اور گالف کورسز فضائی آلودگی کے باعث بند کردیے گئے جب کہ فضائی آلودگی کے سبب نیویارک میں مختلف تقریبات بھی منسوخ کردی گئیں۔  فضا میں آلودگی جمعرات کی صبح تک جاری رہنے کا امکان ہے۔ فضائی آلودگی کے باعث 10 کروڑ سے زائد امریکی متاثر ہیں۔