بھارتی فوج کے نائب صوبیدار نے پہلگام فالز فلیگ آپریشن کا بھانڈہ پھوڑتے ہوئے اپنی ہی فوج کو کشمیر کے بارڈر پر دہشت گردوں کی سہولت کار قرار دے دیا۔
اپنے بیان میں بھارتی فوج کے1مہار رجمنٹ کے نائب صوبیدار سورندر سنگھ کا کہنا تھا کہ یونٹ کے کمانڈنگ آفیسر غدار ہیں، بھارتی فوج کشمیر کے بارڈر پر دہشت گردوں کی سہولت کاری کر رہی ہے، بھارتی فوج ڈیوٹی پر تعینات فوجیوں کو ہٹا کر خود دراندازی کرواتی ہے۔
انہوں نے کہا کہ یہ سب روزنامہ راشٹریا اور ڈیفنس گزٹ میں بھی شائع ہو چکا ہے، بھارتی فوج کی سرپرستی میں ہتھیار اور گاڑیاں دہشت گردوں کو دی جاتی ہیں،وزیر دفاع اور حکام بالا کو شکایت درج کروائی مگر کوئی پیش رفت نہ ہوئی۔
سورندر سنگھ نے بتایا کہ اس انکشاف کے بعد مجھے بارڈر سے ہٹا کر جان سے مارنے کی دھمکیاں بھی دی گئیں، میرے علاوہ دوسرے 20جوانوں کوبھی بارڈرپر ڈیوٹی سے ہٹادیا گیا تاکہ دہشت گردوں کی سہولت کاری ہو، اپنی نااہلی چھپانے کیلئے مجھے پاگل قرار دے کر زبردستی ہسپتال داخل کرادیا گیا جبکہ میری میڈیکل رپورٹ کے مطابق میں مکمل فِٹ ہوں۔
دوسری طرف دفاعی ماہرین نے کہا کہ بھارتی نائب صوبیدار سورندر سنگھ کے ہوشربا انکشافات کے بعد یہ واضح ہو چکا کہ پہلگام حملے کا ڈرامہ بھارت نے خود رچایا، عالمی برادری کو ریاستی سرپرستی میں بھارتی دہشت گردی کا سخت نوٹس لینا چاہئے۔