صیہونی حکومت کے جھوٹے دعوؤں کی ہنڈیا بیچ چوراہے پر پھوٹ گئی، مغربی میڈیا بھی صیہونی حکومت کے پول کھولنے لگا۔
مقبوضہ فلسطین کے محصور علاقے غزہ میں نہتے فلسطینیوں کا قتل عام جاری ہے جبکہ صیہونی حکومت کا یہ دعویٰ کئی مرتبہ جھوٹا ثابت ہو چکا ہے کہ وہ حماس کے ٹھکانوں پر حملے کر رہا ہے۔
صیہونی حکومت نے غزہ کے سب سے بڑے اسپتال الشفا پر حملے کا یہ جواز پیش کیا کہ اس کے نیچے حماس کا کمانڈ اینڈ کنٹرول سینٹر ہے تاہم برطانوی نشریاتی ادارے بی بی سی نے اس دعوے کی قلعی کھول دی۔
بی بی سی نے ایک رپورٹ میں بتایا کہ صیہونی حکومت نے اکتوبر کے اوائل میں ایک اینی میشن جاری کی تھی جس میں دعویٰ کیا تھا کہ الشفا اسپتال کے نیچے حماس کی سرنگیں ہیں تاہم صیہونی حکومت اس اسپتال پر قبضے کے باوجود یہ سرنگیں نہیں دکھا سکا۔
صیہونی حکومت بی بی سی اور فوکس نیوز کو مقبوضہ اسپتال لے گئی وہاں جس فوجی نے ویڈیو بنائی اس کی گھڑی سے پتہ چلتا ہے کہ یہ ویڈیو بی بی سی کو بلانے سے صرف دو گھنٹے پہلے بنائی گئی۔ ویڈیو میں ایک جگہ ایک گن دکھائی گئی جب بی بی سی والے پہنچے تو یہاں موجود بندوقیں دو ہو گئیں، یہ ویڈیو صیہونی حکومت نے پہلے پوسٹ کی، پھر ڈیلیٹ کی اور پھر پوسٹ کر دی۔
صیہونی حکومت نے جو بھی اسلحہ دکھایا اس سے بھِی یہ طے نہیں ہوتا کہ یہ حماس کا کمانڈ اینڈ کنٹرول سینٹر تھا۔
وائٹ ہاؤس کے ترجمان جان کربی کا دعویٰ بھِی جھوٹا نکلا جس میں انھوں نے صیہونی حکومت کی تائید کرتے ہوئے کہا تھا کہ الشفا اسپتال میں حماس کے کمانڈ اینڈ کنٹرول نظام کا ایک شعبہ موجود تھا۔